जनकपुर (मधेस प्रदेश), असार ३१, संघीय खानेपानीमन्त्री प्रदीप यादव तथा मधेश प्रदेश सरकारका मुख्यमन्त्री सतिशकुमार सिंहबीच तराई–मधेस खानेपानी दीर्घकालीन समस्या समाधान गर्न छलफल भएको छ ।
मधेस प्रदेशको जनकपुरमा तराई–मधेस खानेपानी दीर्घकालीन समस्या सम्बन्धमा मुख्यमन्त्री सिंह, प्रदेश उर्जा, सिंचाई तथा खानेपानीमन्त्री शेषनारायण यादव सहित सरोकारवालासँग गहन छलफल भएको मन्त्री यादवको स्वकीय सचिवालयले जनाएको छ ।
सो छलफलका क्रममा मन्त्री यादवले जलवायु परिवर्तनका कारण उत्पन्न भएको सुक्खा समस्या र त्यसले उत्पन्न गरेको खानेपानीको संकट दिनानुदिन गम्भीर बन्दै गएकाले समस्या समाधानका लागि आफु व्यक्तिगत रूपमा र खानेपानी मन्त्रालय संस्थागत रूपमा पूर्ण सक्रिय रहेको जानकारी दिनुभयो ।
मन्त्री यादवले “तराई–मधेस खानेपानी दीर्घकालीन समाधान गर्न सबै तह र तप्काबीच समन्वय र सामूहिक प्रयास आवश्यक रहेको बताए । समस्या समाधानका लागि म व्यक्तिगत रूपमा र खानेपानी मन्त्रालय संस्थागत रूपमा पूर्ण सक्रिय छ ।”
छलफलका क्रममा मुख्यमन्त्री सिंहले मधेश प्रदेशका १३६ वटै पालिकामा सुक्खा र खानेपानीको समस्या गहिरिँदै गएको जानकारी गराएका थिए ।
प्रतिक्रिया दिनुहोस्: