खेलकुद महासंघले गणतन्त्र दिवसमा प्रचण्ड कप भलिबल गर्ने

काठमाडौं चैत २१, अखिल नेपाल खेलकुद महासंघले खेलाडीहरूको बहुप्रतीक्षित दशौं राष्ट्रिय खेलकुद आयोजना प्रभावित नगर्न माग गर्दै आगामी वर्ष प्रचण्ड कप २०८२ राष्ट्रिय पुरुष तथा महिला भलिबल प्रतियोगिता गर्ने भएको छ ।
अखिल नेपाल खेलकुद महासंघको केन्द्रीय समितिको विस्तारित बैठकले लामो इतिहास बोकेको राष्ट्रिय खेलकुद प्रभावित नगर्न माग गर्दै आफ्ना विभिन्न कार्यक्रमहरू सार्वजनिक गरेको हो । गणतन्त्र दिसको अवसर पारेर प्रचण्ड कप पुरुष तथा महिला राष्ट्रिय भलिबल प्रतियोगिता गर्न लागेको महासंघका महासचिव अञ्जन धमलाले विज्ञाप्ति मार्फत जानकारी दिएको छ । प्रचण्ड नेतृत्व सरकारले नै भलिबललाई राष्ट्रिय खेल घोषणा गरेकाले गणतन्त्र दिवसका अवसरमा सोही खेलको प्रतियोगिता आयोजना गर्न लागिएको बताइएको छ ।
‘गणतन्त्र स्थापना र भलिबललाई देशको राष्ट्रिय खेल बनाउन अध्यक्ष प्रचण्डको भूमिका महत्वपूर्ण रहेको सबैलाई थाहा नै छ । तत्कालीन प्रचण्ड सरकारले २०७४ साल जेठ ९ गते भलिबललाई राष्ट्रिय खेल घोषणा गरेको थियो । त्यसैले पनि जेठमा नै भलिबल प्रतियोगिता गर्न लागेका हौं,’ उक्त खेतल नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ को प्रमुख आतिथ्यतामा हुने पनि जनाएको छ ।
‘व्यापक र व्यवसायिक खेल, खेलाडीको सम्मान, समाजवादको यात्रामा दोस्रो राष्ट्रिय सम्मेलन’ भन्ने मूल नाराका साथ महासंघको राष्ट्रिय सम्मेलन सोही वर्षको असार ६ र ७ गते काठमाडौंमा गर्ने निर्णय गरिएको हो । महासंघले योङ ब्रदर्स तेक्वान्दो क्लबसँगको सहकार्य एसियन मार्सल आटर््स गेम्स तथा खेलकुद महोत्सव गर्ने भएको छ । उक्त मार्सल आटर््स गेम्स आगामी जेठ २ र ३ गते गर्नेगरी तयारीसमेत थालेको छ । अध्यक्ष प्रचण्डको नेतृत्वमा तत्कालीन सरकारले ६० करोड विनियोजन गर्दै गत मंसिरमा नै कर्णाली प्रदेशमा बृहत दशौं राष्ट्रिय खेलकुद सम्पन्न गर्ने वातावरण सिर्जना भएको उल्लेख गरेको छ । पहिलोपल्ट राष्ट्रिय खेलकुद आयोजनाअगावै बजेट सुनिश्चिता हुँदा पनि खेलकुद सञ्चानल हुन नसक्नुले खेलाडीहरू खेल्न पाउने अधिकारबाट बञ्चित भएकोमा महासंघले चिन्ता व्यक्त गरेको छ ।
महासंघका अध्यक्ष शिव कोइराला ‘ज्वाला’ ले नेपाली खेलकुदको विकास, विस्तारसँगै अन्तर्राष्ट्रिय क्षेत्रमा सफलता दिलाउनका लागि मद्दत पुग्ने गरी काम गर्न सदैव अग्रसर हुने विश्वास व्यक्त गरेको छ । खेलकुद महासंघका इन्चार्ज दीपक कोइराला ‘रूपक’ ले परम्परागत शैलीको प्रतिस्पर्धाभन्दा पनि खेलकुदको व्यावसायीकरण गर्दै समग्र नेपाली खेलकुदलाई नै माथि उठाउन देशका सम्पूर्ण नागरिक नै एक हुनुपर्ने आवश्यकता औंल्याएका छन् ।