नवराज न्यौपाने
काठमाडौं भाद्र २०, दक्षिण एसियाका लागि विश्व बैंकका उपाध्यक्ष जोहान्स जुटको नेपालको पहिलो पाँच दिने औपचारिक भ्रमण सम्पन्न भएको छ । उक्त अवसरमा जुटले नेपालले आर्थिक क्षेत्रमा गरेको सुधार र प्रगतिको खुलेर प्रसंशा गरेका छन् । यसैसाता नेपाल आएका उपाध्यक्ष जुटले नेपालले शान्ति सुदृढीकरण, सेवा सुधार, लोडसेडिङ अन्त्य, र २०१५ को भूकम्प र कोरोना महामारीबाट अर्थतन्त्रलाई जोगाउन खोलेको भूमिका र रणनीति प्रशंसनीय देखेको विश्व बैंकले प्रेस रिलिजमार्फत जनाएको छ ।
पाँचदिने भ्रमणका क्रममा विश्व बैंकका दक्षिण एसियाका लागि उपाध्यक्ष जोहान्स जुटले उपप्रधान तथा अर्थमन्त्री विष्णु पौडेल, उपप्रधान तथा सहरी विकासमन्त्री प्रकाशमान सिंह र राष्ट्र बैंकका गभर्नर डा. विश्व पौडेलसँग छुट्टाछुट्टै भेटवार्ता तथा गहन छलफल गरेका थिए ।
‘सरकार, निजी क्षेत्र र विकास साझेदारका प्रतिनिधिले कृषि व्यवसाय, पर्यटन, सूचना प्रविधि र अन्य विकास क्षेत्रमा नेपालको उपलब्धि र यिनलाई विस्तार गर्न थप सुधारको महत्व एवं विश्व बैंक समूहले के गर्न सक्छ भन्नेबारे नेपालका वरिष्ठ पदाधिकारीसँग छलफल भयो’ उपाध्यक्ष जुटको नेपाल भ्रमणको क्रममा जारी बिज्ञप्तिमा उल्लेख छ ।
जुटले विश्व बैंक समूहको नेपालका लागि नयाँ देश साझेदारी ढाँचाबारे सरकारको १६ औं योजनासँग सम्बन्धित विषयबारे सरकारी अधिकारीहरुसँग छलफल गरेको थिए । सो छलफलमा विश्व बैंकले नेपालका दुई सबैभन्दा महत्वपूर्ण विकास चुनौतीका रुपमा रोजगारी सिर्जना र विपद् उत्थानशीलतालाई एकिन गर्दै यसका लागि सरकार सचेत हुनुपर्ने सुझाव दिएका छन् ।
विश्व बैंक समूहले आगामी छ वर्ष अर्थात २०३१ भित्रमा देश साझेदारी ढाँचाअन्तर्गत नेपाललाई लगभग ४२.७ अर्ब रुपैयाँ ऋण उपलब्ध गराउने लक्ष्य राखेको जनाएको छ । यसको प्रमुख उद्देश्य पर्यटन र डिजिटल विकाससहित प्रतिस्पर्धात्मक एवं व्यावसायिक वातावरण सुधारेर रोजगारी सिर्जना गर्ने मुख्य लक्ष्य रहेको विश्व बैंकले शुक्रबार जारी विज्ञप्तिमा उल्लेख छ ।
प्रतिक्रिया दिनुहोस्: