काठमाडौं भाद्र १०, डोडा जिल्लामा बादल फाटेर आएको बाढी र पहिरोले कम्तीमा चार जनाको मृत्यु भएको छ र १० भन्दा बढी घरहरू ध्वस्त भएका छन् ।
बाढी र पहिरोका कारण जम्मु–श्रीनगर राष्ट्रिय राजमार्ग बन्द गरिएको छ भने वैष्णोदेवीको तीर्थयात्रा पनि स्थगित गरिएको छ ।
मौसम विभागले डोडासहित विभिन्न जिल्लाहरूमा भारी वर्षाको चेतावनी जारी गरेको थियो।
जम्मु । भारतको जम्मु–कश्मीरस्थित डोडा जिल्लामा बादल फाटेपछि आएको भीषण बाढी र पहिरोले ठुलो विनाश निम्त्याएको छ । यस प्राकृतिक प्रकोपमा परी अहिलेसम्म कम्तीमा चार जनाको मृत्यु पुष्टि भएको छ भने १० भन्दा बढी घरहरू पूर्ण रूपमा ध्वस्त भएका छन् ।
भारतीय सञ्चारमाध्यम आजतकका अनुसार डोडा जिल्लाको थाथरी उप–मण्डलमा बादल फाटेपछि स्थानीय बासिन्दामा त्रास फैलिएको छ । प्रभावित क्षेत्रहरूमा उद्धार टोलीले तत्कालै उद्धार कार्य सुरु गरेको छ । यसअघि कठुआ र किश्तवाड जिल्लामा पनि यस्तै प्रकारका घटनाहरू भएका थिए, जसमा सयौं मानिसले ज्यान गुमाएका थिए ।
पहिरो र चट्टान खस्ने खतरालाई ध्यानमा राख्दै प्रशासनले जम्मु–श्रीनगर राष्ट्रिय राजमार्ग बन्द गरेको छ । खराब मौसमका कारण प्रसिद्ध वैष्णोदेवीको तीर्थयात्रा पनि अस्थायी रूपमा स्थगित गरिएको छ । यसैगरी जम्मु संभागका सबै सरकारी तथा निजी विद्यालयहरू बन्द गरिएका छन् ।
मौसम विभागले यसअघि नै कठुआ, साम्बा, डोडा, जम्मु, रामबन र किश्तवाड लगायत जिल्लाहरूमा अति भारी वर्षाको चेतावनी जारी गरेको थियो ।
प्रतिक्रिया दिनुहोस्: